အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီး ဌာန ပြည်သူ့အင်အားဦးစီးဌာန၊ ကုလသမဂ္ဂလူဦးရေရန်ပုံငွေ အဖွဲ့ (UNFPA) နှင့် OneMap Myanmar တို့ ပူးပေါင်း ကျင်းပသည့် ပြည်သူ့အင်အားဦးစီးဌာန Websiteမိတ်ဆက် ခြင်း၊ ၂ဝ၁၄ ခုနှစ် လူဦးရေနှင့် အိမ်အကြောင်းအရာ သန်းခေါင် စာရင်းအချက်အလက် REDATAM Database နှင့် Online Interactive Maps ရှင်းလင်းတင်ပြခြင်း အခမ်းအနားကို ယနေ့ နံနက် ၉ နာရီခွဲတွင် နေပြည်တော်ရှိ M Gallery Hotel ၌ ကျင်းပသည်။
အခမ်းအနားသို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးအေးလွင်၊ ဝန်ကြီးဌာနများမှ တာဝန်ရှိသူများ၊ ကုလသမဂ္ဂလူဦးရေရန်ပုံငွေ အဖွဲ့ (UNFPA) ဌာနေကိုယ်စားလှယ် Ms. Janet E. Jackson နှင့်OneMap Myanmar မှ တာဝန်ရှိသူများ၊ ဖိတ်ကြားထားသူများ တက်ရောက်ကြသည်။
အစီအစဉ်အရ အမြဲတမ်းအတွင်းဝန် ဦးအေးလွင်က တိကျ မှန်ကန်သည့် သတင်းအချက်အလက် လျင်မြန်စွာရရှိခြင်းသည် နိုင်ငံတော်၏ စီးပွားရေးဖွံ့ဖြိုးတိုးတက်မှုအတွက် အထောက်အပံ့ ကောင်းတစ်ရပ်ဖြစ်ပါကြောင်း၊ မိမိတို့ဝန်ကြီးဌာနသည် ၂ဝ၁၄ ခုနှစ် လူဦးရေနှင့်အိမ်အကြောင်းအရာ သန်းခေါင်စာရင်းကို နှစ်(၃ဝ) အတွင်း ပထမဆုံးအကြိမ် ပြန်လည်ကောက်ယူနိုင်ခဲ့ပြီး သန်းခေါင်စာရင်းရလဒ်များကို အချိန်နှင့်တစ်ပြေးညီ အဆင့် လိုက် ထုတ်ပြန်ခဲ့ပြီးဖြစ်ပါကြောင်း။
ထုတ်ပြန်ခဲ့ပြီးဖြစ်သည့် အချက်အလက်အားလုံးကိုလည်း ပြည်သူများOnline မှ ရယူအသုံးပြုနိုင်ရန်အတွက်Websiteမှလည်း လွှင့်တင်ခဲ့ပါကြောင်း၊ ယခုအခါ အဆိုပါ Website အား နိုင်ငံတကာအဆင့်မီဖြစ်စေရန်နှင့် လူဦးရေဆိုင်ရာ သတင်း အချက်အလက်များကို အချက်အလက် အသုံးပြုသူများမှ အလွယ်တကူရယူနိုင်ရန်အတွက် OneMap Myanmar ၏နည်းပညာပံ့ပိုးကူညီမှုဖြင့် အသစ်ပြန်လည်ပြင်ဆင်ရေးဆွဲခဲ့ရာ ယင်းWebsite အကြောင်းကို ယနေ့ မိတ်ဆက် အသိပေးခြင်း ပင်ဖြစ်ပါကြောင်း၊ ထို့အပြင် အချက်အလက်အသုံးပြုသူများ အနေဖြင့် မိမိအသုံးပြုချင်သည့် စာရင်းဇယားများကို ကိုယ်တိုင် ပြုစုနိုင်ပြီး မိမိတို့၏စီမံကိန်းများနှင့် သုတေသနလုပ်ငန်းများ တွင် ထည့်သွင်းအသုံးပြုနိုင်စေရန်အတွက် REDATAM Database ကိုလည်း ပြုစုခဲ့ပြီးဖြစ်ပါကြောင်းနှင့် သန်းခေါင် စာရင်းမှရရှိသည့် အချက်အလက်များမှ Micro Data (၁ဝ) ရာခိုင်နှုန်းကို တောင်းခံလာပါက ပံ့ပိုးပေးသွားမည်ဖြစ်ပါကြောင်း၊ ယင်းကဲ့သို့ ဆောင်ရွက်ပေးမှုကြောင့် မိမိတို့နယ်ပယ်၊ ဒေသ အလိုက် စာရင်းအင်းအချက်အလက်များကို ပိုမိုအကျိုးရှိစွာ အသုံးချနိုင်ပြီဖြစ်ပါကြောင်း ရှင်းလင်းပြောကြားသည်။
ထို့နောက် ကုလသမဂ္ဂလူဦးရေ ရန်ပုံငွေအဖွဲ့(UNFPA) မှ ဌာနေကိုယ်စားလှယ်Ms. Janet E. Jackson က ပြည်လုံး ကျွတ် သန်းခေါင်စာရင်းကောက်ယူခြင်းနှင့် အစီရင်ခံစာများ အဆင့်ဆင့်ထုတ်ပြန်နိုင်ရေးအတွက် UNFPA မှ ပံ့ပိုးကူညီ ဆောင်ရွက်ပေးမှုအခြေအနေများ၊ OneMap Myanmar မှ တာဝန်ရှိသူတစ်ဦးကWebsiteအသစ်ပြင်ဆင်ရေးဆွဲ ဆောင်ရွက်ပေးမှုများ၊ ပြည်သူ့အင်အားဦးစီးဌာန ခေတ္တ ညွှန်ကြားရေးမှူးချုပ် ဒေါက်တာညီညီက Websiteနှင့် ပတ်သက်သည်များကို လည်းကောင်း ရှင်းလင်းပြောကြား ကြသည်။
ယင်းနောက် Interactive Maps အသုံးပြုပုံ၊REDATAM Database နှင့် Excel Data ၊Micro Data Launching နှင့်ပတ်သက်သည်များကို ရှင်းလင်းတင်ပြ ကြပြီး တက်ရောက်လာကြသူများမှ သိရှိလို၍ မေးမြန်းချက် များအပေါ် တာဝန်ရှိသူများက ပြန်လည်ရှင်းလင်းဆွေးနွေး ကြသည်။
မြန်မာနိုင်ငံတွင် ပြည်လုံးကျွတ်အဆင့် ကောက်ယူခဲ့သော ၂ဝ၁၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်း အချက်အလက်များကို အခြေခံ၍ ပြည်ထောင်စုအဆင့် အစီရင် ခံစာများ၊ နေပြည်တော်အပါအဝင် တိုင်းဒေသကြီး/ပြည်နယ် အဆင့်အစီရင်ခံစာ ၁၅ စောင်၊ အသေးစိတ်ဆန်းစစ်လေ့လာ ထားသော သုတေသနစာတမ်း ၁၃ စောင်၊ သန်းခေါင်စာရင်း ရလဒ် မြေပုံအစီရင်ခံစာ၊ မြို့နယ်/မြို့နယ်ခွဲ အစီရင်ခံစာပေါင်း ၄ဝဝ ကျော်တို့ကို ပြုစုထုတ်ပြန်ခဲ့ပြီး ယင်းအစီရင်ခံစာများအား ပြည်သူများOnline မှ အလွယ်တကူရယူ အသုံးပြုနိုင်ရန် အတွက် www.dop.gov.mm ဝက်ဘ်ဆိုက်မှ လွှင့်တင်ခဲ့သည်။
ယခုအခါ ပြည်သူ့အင်အားဦးစီးဌာန၏ Website ကို OneMap Myanmar ၏ ပံ့ပိုးကူညီမှုဖြင့် အသစ်ပြန်လည် ပြင်ဆင်ရေးဆွဲခဲ့ရာ အဆိုပါ Websiteတွင် ပင်မစာမျက်နှာ၊ သန်းခေါင်စာရင်းအကြောင်းအရာများ၊ သန်းခေါင်စာရင်း အစီရင်ခံစာများ၊ စာရင်းဇယားနှင့်မြေပုံများ၊ လူဦးရေဆိုင်ရာ လှုပ်ရှားမှုများ၊ ပြည်သူ့အင်အားဦးစီးဌာန၏ နောက်ခံသမိုင်းနှင့် ပြခန်းဟူ၍ ကဏ္ဍ ခုနစ်ခု ခွဲခြားထားကြောင်း သိရသည်။
credit to: myanmaallin
